SUMATRA YAIFUTA JAMATINI

By Method Chaz Wednesday, 28 March 2018

Share Tweet Share Pin Email

DODOMA

Mamlaka ya Udhibiti wa usafiri majini na Nchi kavu (SUMATRA) kanda ya kati Dodoma katika kupanga mji wake kuanzia kesho Alhamisi Machi 29 mwaka huu, njia za daladala  zitabadilika na kurefushwa ikiwa ni pamoja na kufuta stendi ya Jamatin, badala yake magari hayo yatakuwa yakiishia NaneNane stendi mpya ya Mabasi.

Akizungumza jana, Ofisa Mfawidhi Kanda ya Kati wa Sumatra, Conrad Shiyo alisema njia hizo ndefu zimepangwa kwa ushirikiano wa Jeshi la Polisi, Manispaa ya Dodoma na Chama cha Wamiliki wa Daladala Dodoma (UWEDO).

Shiyo alisema katika marekebisho hayo, daladala zinazofanya safari kati ya Udom na Veyula zitakuwa zikitoka Udom zinapita kwa Waziri Mkuu, Posta, General Hospital, Independence, Sango na kupita NBC na kwenda Veyula na wakati wa kurudi kutoka Veyula zitapita Paradise, Nyerere, Posta hadi Udom.

Aidha daladala zitakazo toka Nala zitapita Sango, Hospitali ya Mkoa, Posta hadi Benjamin Mkapa Hospitali na kurudi kwa kupitia Posta, General Hospitali, Independence hadi Nala.

Hata hivyo Ofisa huyo wa Sumatra alisema pia kutakuwa na njia ya Veyula hadi Nanenane, daladala zikitoka huko zitapita Paradise, Nyerere, CBE hadi Nanenane na kurudi kupitia CBE, Carnival, General, Independence, Sango, NBC na kurudi Veyula.

Aidha daladala za kutoka Chang'ombe hadi Nanenane, hizo zitapita njia ya Paradise, Nyerere,  CBE hadi Nanenane zitapita CBE, Carnival, Genereal Hospital, Independence, Sango na kurudi Chang’ombe.

Magari ya kutoka St Gema hadi Swaswa au Nanenane, zitapita Paradise, Nyerere,  CBE hadi Swaswa na kutoka Nanenane zitapita CBE, Carnival, General, Independence, Sango, NBC kurudi St Gema.

Kuhusu daladala za Nkuhungu hizo zitapita vituo vya Sango, General, CBE hadi Nanenane na kurudi kwa kupitia kituo cha CBE, Carnival, Independence, Sango hadi Nkuhungu.

Daladala kutoka Mkonze zitapita vituo vya Kikuyu, Majengo, General, CBE hadi Nanenane na wakati wa kurudi zitapita vituo ni CBE, Carnival, General,  Majengo, Kikuyu hadi Mkonze.

Alisema pia kwa daladala zinazotoka Swaswa, Uzunguni na Nanenane na kurudi huko kupitia vituo vya CBE, Carnival, kisha njia ya uelekeo wa barabara ya sabasaba hadi D.Center (Makole) kisha kutokea mbele ya CBE na kurudi yalikotokea.

Shiyo alisema mabadiliko ya njia yanalenga kuboresha usafiri mjini, kwani zitatakiwa katika daladala si kuegesha bali kushusha pungufu ya dakika saba na kuondoka, lakini akawataka wananchi wasisubiri Jamatini bali kwenye vituo vilivyoanishwa. 

Alisema katika kuhakikisha magari yote daladala na magari makubwa yanahamia Nanenane, vyombo vyote vitasimamiwa na kuhakikisha kwamba magari makubwa yanahama na daladala zinaanza safari ya kwenda huko ili kuwapa huduma wananchi wanaotaka kusafiri kati ya mji na nje ya mkoa.