Yanga yacharazwa na Mbao Fc 2 -0

By Method Chaz Sunday, 31 December 2017

Share Tweet Share Pin Email

 

MBAO FC imeendeleza ubabe mbele ya Yanga baada ya ushindi wa mabao 2-0 leo Uwanja wa CCM Kirumba mjini Mwanza.
Shujaa wa Mbao FC alikuwa ni mshambuliaji chipukizi, Habib Hajji Kiyombo aliyefunga mabao yote hayo dakika za 53 na 68. 
Na kwa ushindi huo,  Mbao FC inafikisha pointi 14 baada ya kucheza mechi 12 na kupanda hadi nafasi ya saba kutoka ya nane.
Yanga wao wanajitoa kwenye tatu bora, wakibaki na pointi zao 21 baada ya mechi 12 za msimu wa 2017-2018, wakiwa nyuma ya Singida United pointi 23 na Azam na Simba zenye pointi 26 kila moja.

 Kiyombo  alifunga bao la kwanza dakika ya 53 kwa shuti la umbali wa mita 25 baada ya kuwatoka wachezaji wa Yanga na la pili dakika ya 68 kwa shuti pia, safari hii ndani ya boksi baada ya kupokea pasi ya Boniphace Maganga.
Katika mchezo huo uliochezeshwa na refa Suleiman Kinugani aliyesaidiwa na Jesse Erasmo wote wa Morogoro na Godfrey Kihwili wa Arusha, kipindi cha kwanza timu zote zilishambuliana kwa zamu
Beki Abdallah Hajji Shaibu ‘Ninja’ akicheza mechi yake ya kwanza ya Ligi Kuu msimu huu tangu asajiliwe Yanga msimu huu alicheza vizuri kwa kujiamini na ustadi wa hali ya juu dhidi ya washambuliaji chipukizi, wepesi na mahiri wa Mbao akina James Msuva, Habib Kiyombo na Emmanuel Mvuyekure.